Diphallia ဒါမှမဟုတ် မွေးရာပါ လိင်တံနှစ်ခုပါတာကို ယောက်ျားလေးအများစုကတော့ ကံကောင်းတယ်လို့ သတ်မှတ်နိုင်ပေမယ့် တကယ်တမ်းမှာတော့ ကျန်းမာရေးပြဿနာတစ်ခုပါပဲ။ Diphallia ဟာ မျိုးဗီဇဆိုင်ရာ ကျန်းမာရေးပြဿနာတစ်ခုဖြစ်ပြီး ယောက်ျား ၆ သန်းမှာ တစ်ယောက်မှာသာ ဖြစ်နိုင်တဲ့အထိ ရှားပါးတဲ့အခြေအနေဖြစ်တယ်လို့ စစ်တမ်းများအရ တွေ့ရပါတယ်။ လိင်တံနှစ်ခုရှိခြင်းဟာ ယေဘုယျအားဖြင့် ပြဿနာမရှိပေမဲ့ နောက်ဆက်တွဲ တခြားကျန်းမာရေးပြဿနာတွေ ဝင်လာနိုင်တာကိုတော့ သတိပြုသင့်ပါတယ်။
#သူ့ရဲ့လက္ခဏာတွေက ဘာတွေလဲ
Diphallia ပြဿနာနဲ့ မွေးလာတဲ့ ယောက်ျားလေးတွေဟာ မွေးဖွားစဉ်မှာ လိင်တံ၊ ဝှေးစေ့နဲ့ ကပ္ပါယ်အိတ်မှာ ပုံမှန်မဟုတ်တဲ့ ရုပ်ပိုင်းဆိုင်ရာ လက္ခဏာတွေကို အလွယ်တကူမြင်ရနိုင်ပြီး ဒီလူတွေရဲ့
၁။ ၈၀ - ၉၉% ခန့်မှာ လိင်တံ၊ ကပ္ပါယ်အိတ် နှစ်ခြမ်းကွဲနေတတ်ပါတယ်။
၂။ ၃၀ - ၇၉% ခန့်မှာ စအိုမှ သဘာဝအတိုင်း မစင် မစွန့်နိုင်ခြင်း၊ ဆီးလမ်းကြောင်းနှစ်ခု ကွဲထွက်နေခြင်း၊ ကပ္ပါယ်အိတ်က ပုံမှန်အနေအထားမှာမရှိနေတဲ့ လက္ခဏာတွေကို တွေ့ရတတ်ပါတယ်။
၃။ ၅ - ၂၉% ခန့်မှာသာ တွေ့ရတဲ့ ရှားပါးလက္ခဏာနဲ့ ပြဿနာတွေကတော့…
ကျောက်ကပ်အနေအထား မှားယွင်းနေခြင်း
သုက်ပိုးကောင်ကို ပုံမှန်အတိုင်း မထုတ်လုပ်နိုင်ခြင်း
ဆီးခုံရိုးအနေအထား မှားယွင်းနေခြင်း
ခန္ဓာကိုယ်ပြင်ပမှာ ကျောက်ကပ်ရောက်နေခြင်း
ဝှေးစေ့ အောက်မကျလာခြင်း
လိင်တံထိပ်ပေါက် အနေအထားမှားနေခြင်း
ကျောက်ကပ်အပိုပါနေခြင်း
အူကျွံခြင်း စတာတွေပဲ ဖြစ်ပါတယ်။
#ဒီပြဿနာကို ကြိုတင်ကာကွယ်လို့ ရလား
မျိုးရိုးဗီဇဆိုင်ရာ ကျန်းမာရေးပြဿနာဖြစ်တဲ့အလျောက် မိဘတွေဘက်က ကြိုတင်ကာကွယ်မှုတွေ လုပ်ထားလို့မရသလို၊ ဖြစ်နိုင်ခြေကို လျှော့ချပေးနိုင်တဲ့ နည်းလမ်းတွေလည်း မရှိပါဘူး။
ရှားပါးဖြစ်စဉ်တစ်ခုဖြစ်တာကြောင့် ကိုယ့်ကလေးမှာ ဒီပြဿနာဖြစ်လာနိုင်ခြေဟာလည်း တော်တော်လေးကို နည်းပါးပါတယ်။
#Diphallia အတွက် ဘယ်အချိန်မှာ ဆရာဝန်နဲ့ သေချာပြသမလဲ
၁။ မီးဖွားပေးလိုက်တဲ့ ဆရာဝန်အနေနဲ့ ကလေးမွေးလာစဉ်ကတည်းက ဒီကျန်းမာရေးပြဿနာရှိမရှိကို အလွယ်တကူ အတည်ပြုပေးမှာဖြစ်ပြီး အသက်ကြီးလာလို့ တခြားကျန်းမာရေးပြဿနာတွေ ကြုံတွေ့ခြင်းမရှိတဲ့တိုင်အောင် ပုံမှန်ကျန်းမာရေးစစ်ဆေးမှု ခံယူဖို့တော့ လိုအပ်ပါတယ်။
၂။ Diphallia ရှိနေပေမယ့်လည်း တခြားကြီးမားတဲ့ ကျန်းမာရေးပြဿနာမရှိဘူးဆိုရင် သာမန်လူတစ်ယောက်လိုပဲ ကျန်းကျန်းမာမာနဲ့ သက်တမ်းစေ့နေနိုင်ပါတယ်။ ပုံမှန်အားဖြင့် မဖြစ်မနေကုသစရာ မလိုဘူးဆိုပေမယ့်လည်း ကုသမှုခံယူချင်တယ်ဆိုရင်လည်း ခွဲစိတ်ကုသမှုခံယူပြီး ပိုနေတဲ့ လိင်တံ၊ ဝှေးစေ့၊ ဆီးလမ်းကြောင်းကို ခွဲစိတ်ဖယ်ရှားနိုင်ပါတယ်။
၃။ မွေးဖွားစဉ်ကတည်းက ပါလာခဲ့တဲ့ လိင်တံနှစ်ခုလုံးဟာ များသောအားဖြင့် ထောင်မတ်နိုင်မှု၊ လိင်ဆက်ဆံနိုင်မှု၊ မျိုးအောင်နိုင်မှု၊ ဆီးသွားနိုင်မှု၊ သုက်လွှတ်နိုင်မှု စတဲ့လုပ်ငန်းဆောင်တာတွေအားလုံးကို အဆင်ပြေပြေ လုပ်ဆောင်နိုင်မှာဖြစ်ပြီး ပုံမှန်အတိုင်း သာယာတဲ့အိမ်ထောင်ရေးဘဝကို ခံစားရစေမှာပါ။
၄။ ချွင်းချက်အနေနဲ့ ဆီးသွားဖို့၊ မျိုးအောင်နိုင်ဖို့ အခက်အခဲဖြစ်လာတာ၊ ထောင်မတ်နိုင်စွမ်းမရှိတော့တာ၊ ကိုယ်တွင်းအင်္ဂါတွေမှာ ထိခိုက်ပျက်စီးမှုတွေ ဖြစ်လာတယ်ဆိုရင်တော့ ကုသမှုလိုအပ်ပါတယ်။
အချုပ်အားဖြင့်ဆိုရမယ်ဆိုရင် အများစုက ကံကောင်းတယ်လို့ မှတ်ယူထားကြတဲ့ လိင်တံနှစ်ခုပါတဲ့ အမျိုးသားတွေဟာလည်း တခြားကျန်းမာရေးပြဿနာမရှိဘူးဆိုရင် သာမန်လူတွေလိုပဲ ကျန်းမာပျော်ရွှင်ပြီး လိင်မှုဘဝသာယာတဲ့ ဘဝနေ့ရက်တွေကို ပိုင်ဆိုင်ရနိုင်ပါတယ်ခင်ဗျာ။
(ရဲမျိုးမြတ်)
No comments:
Post a Comment